Ferskur mozzarella og basilíka eiga svo einstaklega vel saman og ekki síður á pizzu!

Nýjar Mozzarella kúlur með basilíku eru tilvaldar á pizzu en einnig í rétti eins og salöt, snittur, pasta- og ofnrétti og forrétti ýmiss konar. 

Hráefni í fimm 10“ pizzur

Pizzadeig:

• 700 g hveiti
• 1 pk þurrger
• 2 tsk. salt
• 400 ml volgt vatn
• 4 msk. ólífuolía

Álegg:

• 3 dósir Mozzarella kúlur með basilíku
• 400 g rifinn pizzaostur frá Gott í matinn
• 5 stk. tómatar
• 5 tsk. grænt pestó
• 5 tsk. jómfrúar ólífuolía
• pizzasósa
• klettasalat
• furuhnetur
• Goðdala Feykir, rifinn
• Fersk basilíka

Aðferð

Pizzadeig

1. Setjið hveiti, þurrger og salt í skál og blandið saman.
2. Hafið vatnið ylvolgt. Hellið því saman við þurrefnin ásamt olíunni og blandið saman með króknum.
3. Hnoðið að lokum aðeins saman í höndunum og setjið í skál sem búið er að pensla með matarolíu, veltið deiginu um, plastið og leyfið að hefast í um klukkustund.
4. Skiptið því síðan niður í 5 hluta og fletjið út áður en áleggið er sett á.

Samsetning

1. Hitið ofninn í 220°C.
2. Byrjið á því að smyrja pizzasósu yfir alla botnana (magn eftir smekk) og stráið rifnum pizzaosti þar næst yfir allt.
3. Næst má skera tómatana í sneiðar og raða þeim ásamt Mozzarella kúlunum með basilíku jafnt á pizzurnar.
4. Bakið við 220°C í um 12-15 mínútur og undirbúið annað álegg á meðan.
5. Blandið saman pestó og ólífuolíu og setjið óreglulega yfir pizzurnar þegar þær koma úr ofninum.
6. Að lokum má setja klettasalat, furuhnetur, rifinn Goðdala Feyki og ferska basilíku eftir smekk.

Eftir Berglindi Hreiðarsdóttur