Einstaklega góður og KETO vænn réttur sem hentar hvort sem er í matarboðum eða hversdags. Athugið að ef svo illa vill til að fersk úrbeinuð kjúklingalæri eru uppseld verða frosin úrbeinuð læri á innkaupalistanum. Munið líka að bera saman þyngd í innkaupalistanum og uppskriftinni, stundum þarf að bæta við pakkningu.
Hráefni - fyrir fjóra
- 800 g Úrbeinuð kjúklingalæri
- 1 stk. Rauðlaukur
- 1 msk. Timjan (ferskt eða þurrkað)
- 1 dl Hvítvín (má sleppa og nota bara kjúklingasoð)
- 2 dl kjúklingasoð (vatn og kjúklingakraftur)
- 2 dósir sýrður rjómi 36% frá Gott í matinn
- 2 msk. Dijon sinnep (2-3 msk. og gott að nota gróft og venjulegt til helminga)
- Salt og pipar
- Smjör til steikingar
- Fersk steinselja
Allt hráefni er á innkaupalistanum nema salt, pipar og smjör til steikingar.
Aðferð
- Byrjið á að hita pönnu með dálitlu smjöri, kryddið kjúklinginn með salti og pipar og steikið báðum megin þar til vel brúnaður. Setjið á disk og lækkið aðeins hitann á pönnunni.
- Steikið laukinn í 2-3 mínútur eða þar til hann mýkist aðeins. Kryddið með timían, salti og pipar.
- Hellið hvítvíni og kjúklingasoði á pönnuna, skafið vel botninn og leyfið að sjóða í nokkrar mínútur.
- Bætið þá sýrða rjómanum út á ásamt Dijon sinnepi. Leyfið aðeins að malla og smakkið ykkur til.
- Setjið að lokum kjúklinginn út í sósuna og leyfið að eldast í um það bil 10 mínútur við meðalhita.
- Stráið ferskri steinselju yfir að lokum og berið fram.
Verði ykkur að góðu!
Eftir Helenu Gunnarsdóttur
